超經典！輸在起跑線贏在終點線

「巴基之星」向來令馬迷又愛又恨，首次同大家見面嘅方式，已令你一見難忘，2016年7月1日沙田1,200米新馬賽，佢喺大漏閘沿途包尾劣勢下，最後直路一口氣超越晒13匹賽駒，末段速度以「快到唔科學」姿態勝出，賽事片段傳遍全球，唔睇賽馬都識得「巴基之星」，有網民甚至以此反駁香港家長擔心子女「輸在起跑線」係唔使驚。

一鳴驚人後，「巴基之星」成長路經歷起起跌跌，去年喺一場國際三級賽，「巴基之星」起步後約200米突然煞停，唔肯再跑，當時策騎嘅騎師莫雷拉都冇符。有評論猜測，「巴基之星」唔鍾意莫雷拉，亦有網民稱，罷跑原因係「巴基之星」悼念已故宿敵「佳龍駒」，所以唔想跑。

罷跑到捧盃 馬迷又愛又恨

罷跑事件後，「巴基之星」休戰半年，期間美國著名馬匹傳心師Monty Roberts專程來港同佢「對話」，據說「巴基之星」向呢位傳心師訴苦，話喺賽事中被鞭打，好唔開心所以罷跑。經過一番開解，「巴基之星」今年2月復出，上月底贏得首項國際一級賽——愛彼女皇盃，唔少馬迷都為佢勝出感動流淚。