標準流浪再砌和富大埔大報復
「中銀人壽香港超級聯賽」今日上演冤家大戰，和富大埔於主場大埔運動場迎戰標準流浪，重演早前足總盃8強戲碼。雖然「綠戰士」上仗交手以3比0贏波晉級，但主帥李志堅坦言不敢輕敵；客隊教練蘇洋則落柯打望球員吸取教訓後打醒十二分精神，想知標準流浪能否成功復仇威番鋪，記得黐實東網睇直播喇！（東網on.cc周日下午2時30分直播）
和富大埔近4場不敗，上場足總盃8強又順利以3球擊敗標準流浪，惟和富大埔主教練李志堅表示：「其實冇乜邊隊你會覺得好易應付，上場盃賽上半場都係陷於膠着，大家都明白盃賽以唔失第一球為目標。贏3比0我唔覺得好叻，今場波亦唔覺得會容易應付，因為每個球會、球員都會為將來打拚，相信冇一隊會放鬆嚟踢。」
球季踏入尾聲，「堅Sir」指任何比賽都要全力以赴：「去到呢刻，場場都想贏。大家都有無限決心，盡力而為啦，盡全力去爭取所有想爭取嘅嘢。」現時和富大埔傷兵計有呂志興及馮慶燁，呂志興雖已復操，但「堅Sir」稱會小心為上：「佢嘅情況比較難估計，有時都要踢過先知，但佢呢個年紀都係小心啲好。」
蘇洋：上場輸經驗冇輸信心
標準流浪自上月初作客賽和R&F富力後，至今在本地賽事已錄得3連敗，其中對冠忠南區因傷退下火線的巴西中堅莫斯奧，經檢驗後證實拉傷大腿，教練蘇洋坦言對球隊有一定影響：「依家最困難係冇咁多人腳，希望球員表現出職業球員嘅態度。」
對於上仗表現，蘇洋認為球員上了寶貴一課︰「上場輸畀大埔3球，其實前60分鐘做得好好。呢班球員做到咁樣嘅水平，我都好滿足。睇番片段，其實3球都係輸經驗，所以有同球員講，叫佢哋唔好咁在意。畢竟呢個係過程，要通過錯誤同改善先可以做得更好。今個星期對大埔會努力，希望個個都做到最好，打出流浪拚搏精神。」
今日賽程
中銀人壽香港超級聯賽
和富大埔 Vs 標準流浪
大埔運動場
下午2時30分
$80、$30（特惠票）
夢想FC Vs 陽光元朗
青衣運動場
下午5時30分
$60、$20（特惠票）