今日足總盃8強頭場賽事假將軍澳運動場上演，由衞冕傑志火併理文，下午2時30分開戰。雖然傑志剛於亞冠盃提早出局，但為力爭本地賽事「三冠王」，即使本周五將有「聯賽登基戰」惡鬥香港飛馬，相信今仗仍會全力撲擊理文。
於上周三的亞冠盃分組賽，傑志迎戰中超球隊天津權健戰至完場前才告失守，表現毫不失禮，即使今仗列斯奧、艾里奧及盧均宜3人因傷倦勤，但主教練朱志光對麾下球員充滿信心︰「我哋都有足夠嘅球員，但始終一對中堅受傷，都要諗吓點樣調配。經過亞冠一場咁激烈嘅比賽，雖然臨尾輸咗，不過士氣未受影響。依家球季去到最後直路，目前最重要都係點樣去保持球員狀態。」
至於理文方面，上仗聯賽迎戰陽光元朗，因下半場一次失誤導致輸波，教練林慶麟表示，希望球員能吸取教訓，避免因犯錯而給予對手機會。對於傑志有3位主力缺陣，林慶麟稱其實對理文未必有「着數」︰「傑志嘅壓迫力好強，就算有好多人傷，但佢哋個陣容依然好強，就算冇分踢亞冠盃嘅球員，都屬於有質素同能力，點都係難應付。」