71歲「波記」管掂科蘭辛祖

「我？我無咩好講喎！我係最普通嘅人、最低微就係我！球隊冇咗我唔會點，冇老闆就唔得喇！」這位酷似卡通「小丸子爺爺」的老人家，一邊唸唸有詞，一邊拉開櫈坐好，細說27年在球圈工作的一點一滴。「我入行好偶然， 40幾歲時冇嘢做，1991年識咗當時嘅快譯通秘書，一做就10年。之後花花做咗兩年，2003年嚟到傑志就做到依家。」「波記」父母移民加拿大前在港開「士多」，身為太子爺的他因不習慣外地生活回流香港。「嗰邊好悶架，我本身鍾意熱鬧。」也許因喜歡熱鬧，所以日復日為一大班球員服務也不覺倦。

40幾歲腦筋記性100分

「練習11點，我9點半左右就返到嚟。」「波記」笑言自己這個年紀不用睡那麼多，上午7時便起床上班。「返到嚟要預備三十幾個人嘅衫、褲、襪，佢哋一返到嚟就有得着，我記得晒佢哋啲位。」在傑志工作15年，日常工作全難不到他，連球員號碼也倒背如流。「辛祖咪11號！」指指後面的唐建文問：「『唐文』幾多號？」這位大內總管得戚道：「21囉！唔使考我喇，哈哈！呢啲考我唔到，我好好記性。之前耳骨有瘤，去睇埋腦科，醫生話我個腦係40幾歲嘅腦，所以記性好好！有時右邊聽嘢差啲，你哋叫我可能聽唔到，唔好鬧我唔睬人喇！」

傑志季中獲世界級球星科蘭助陣，全城為之瘋狂，但見慣大風浪的「波記」完全沒被對方氣場震懾：「佢嚟到我都冇咩嘢，唔會驚奇。我對佢哋都一樣好，唔會偏心。佢哋都對我好好，走咗都記得我，好似列文返嚟會定時定候打畀我。」多年來與傑志東征西討，今年七十有一更隨軍首踏亞冠舞台，這位「老兵」只望球隊搏盡：「亞冠係好高水平嘅賽事，但球員心態最緊要！大家都係兩隻腳，肯搏嘅輸咪輸囉幾咁閒啫，打咩波都係咁話！」

「退休無限期做到做唔到」

問到「波記」有沒有退休打算，原以為熱愛自己工作的他會說「如果要為這份工作加上一個期限，我希望是一萬年」，但早已遠超退休年齡的他只淡然道：「我無限期嘅，一係自己唔做得，一係佢哋唔再請我！預咗喇呢啲年紀，如果佢哋叫我唔使返工，都唔會驚奇、傷心，咁嘅年齡預咗冇嘢做。」視傑志為家的他笑笑說：「唔做最多走去睇波，我已經同啲球員講定，叫佢哋到時拎飛畀我！哈哈！」

常言道「家有一老，如有一寶」，傑志家的「寶」，不只是從世界各地簽回來的球星、自家製青訓產品，或象徵勝利的獎盃、獎牌，更是這個難以取替、和藹可親的老公公。

出錢請粉絲睇波

「波記」在傑志工作多年，是球隊「萬人迷」。備受球迷尊重的同時，「波記」亦以心相待：「我知球迷好鍾意我，喺球場成日聽到佢哋『波記、波記』咁叫我，我都好錫佢哋，特別有幾個公公婆婆，我有時會自己出錢請佢哋入場！」

圖/文：胡恩晴

本周賽程

亞冠盃分組賽

3月14日（三）

傑志 Vs 柏雷素爾

香港大球場

晚上8時

$300、$250、$100（特惠票）

菁英盃分組賽

3月17日（六）

B組：R&F富力 Vs 冠忠南區

元朗大球場

下午2時30分

$80、$30（特惠票）

A組：東方龍獅 Vs 陽光元朗

旺角大球場

下午5時30分

$80、$30（特惠票）

3月18日（日）

B組：傑志 Vs 標準流浪

斧山道運動場

下午2時30分

$80、$30（特惠票）

A組：理文 Vs 和富大埔

青衣運動場

下午5時30分

$80、$30（特惠票）