「經理」一樣要出辣招

香港飛馬近呢幾年用上好多本地年輕球員，畀佢哋發揮空間，教練嘅責任先係「星探」負責「揀蟀」，發掘潛質新人。之後就會化身「魔鬼教練」提供有系統訓練，加速佢哋成長，令每位球員喺適當嘅時候發揮最強本領。唔少得就係做埋「經理」，即係「乜都經你、乜都要理」，協助佢哋解決私人事務及管理情緒。

事關我係紅褲子出身，曾有幸「被邀請」上山學藝，亦兼任港隊青年軍助教，多咗機會接觸到有團火嘅後生仔，「揀蟀」相對容易，「拔尖」機會較高。

我亦明白到球員嘅心態及面對嘅挑戰，除咗會編定嚴格訓練，更貼地咁同香港飛馬球員分享大賽經驗。相信大家都可以感受到今年季初團火，可能比賽經驗較淺，好成績令年輕球員心理上壓力較大，導致表現唔穩定，所以接住我哋教練團就要做好「經理」呢個角色。其實飛馬好注重球員心理狀態，因此提供瑜伽堂畀球員紓緩緊張嘅情緒。至於我其中一項獨有嘅「減壓辣招」，就係唔同佢哋講足球。

專欄輪住嚟

香港飛馬助教 朱兆基