柔道要攞分，就係要將對手摔落地上，又或者將對手壓倒，令對方「無得郁」，或者利用關節技或勒頸等令敵方屈服。好多時都聽過「一本」（IPPON），只要將對手「撻」落地，背部大部分都貼地，又或者壓制對方在地上20秒，就當一本勝，立即勝出兼結束比賽，其實就好似拳擊K.O.對手一樣，唔需要再繼續比賽。
原則上柔道每場比賽為時4分鐘，雙方運動員要在限時內爭取分數，當然每場比賽唔一定會出現「一本」，只要能壓到對手半邊身倒地，或鎖住對方都可以攞到「半勝」（wazaari），亦即係在分牌上所見到的分數，即攞到1個wazaari，分牌上會顯示１，攞到10個wazaari就會顯示10，攞得多wazaari一方，就會贏出比賽，但倘若遇到對手反擊一個「一本」，即使有100個wazaari都一樣判輸，所以攻守的技術都要有。
柔道分好多個級別，主要用體重來分級別，喺國際比賽，成人組有男女子各7個級別，女子組最輕係48公斤以下，男子組最輕就係60公斤以下。每項運動都有唔少規則，柔道一樣有犯規，裁判會畀黃牌警告，選手累積滿三張黃牌，就出紅牌，比賽就會結束，亦會宣告對手勝出。咁點先算犯規呢，最清楚當然係選手踩出界，另外選手如果比賽表現消極唔出招，都一樣係犯規！