格芬飛越「艾菲爾鐵塔」入樽
快艇昨日主場以102比84擊敗爵士，失去基斯保羅後反而開季3戰全勝，成績令人驚喜，比賽期間「新船長」格芬在法國的高拔封阻前，強力施展隔人暴扣，有傳媒甚至形容這次入樽是飛越艾菲爾鐵塔！另邊廂，塘鵝「一眉道人」安東尼戴維斯昨對拓荒者一戰弄傷膝頭，成為今季球星受傷災難中另一不幸者。
比賽首節時，格芬在外線快速擺脫列比奧後，大步殺入籃底，再趁高拔起跳封阻前施展隔人暴扣，被喻為可能是今季最佳入樽。雖然有球迷覺得，當時格芬左手有推人動作，疑似犯規，但既然球證冇吹罰，傳媒自然將這下入樽吹到上天，形容格芬飛越艾菲爾鐵塔，最終格芬全場有22分、9個籃板同6次助攻，帶領快艇繼續贏；就算高拔有12分、7個籃板同2次助攻，都救唔到爵士。
安東尼戴維斯左膝又傷
同日，騎士主場以119比112擊敗公牛，由於新加盟的湯馬士同戴歷羅斯分別因傷缺陣，勒邦占士鮮有地被安排以控球後衞身份出戰，結果他上陣37分鐘，取得34分、2個籃板、13次助攻同3次搶截，足夠令騎士重響勝鼓。
至於塘鵝以93比103不敵拓荒者，安東尼戴維斯於開賽後5分鐘，因為左膝受傷離場，他曾於12/13年同15/16年球季，左膝受創提早收咧，今次他要接受MRI檢查，未知要休息多久，加上朗度、所羅門希爾同法蘭克積臣都有傷，意味塘鵝的陣容會更殘缺。
周四賽程
7:00am 黃蜂 Vs 金塊
7:00am 活塞 Vs 木狼
7:00am 76人 Vs 火箭
7:30am 籃網 Vs 騎士
8:00am 熱火 Vs 馬刺
8:00am 雷霆 Vs 溜馬
8:30am 小牛 Vs 灰熊
10:00am 太陽 Vs 爵士
10:30am 勇士 Vs 速龍
10:30am 湖人 Vs 巫師
周五賽程
8:00am 公牛 Vs 鷹隊
8:00am 灰熊 Vs 小牛
8:00am 公鹿 Vs 塞爾特人
10:00am 拓荒者 Vs 快艇
10:30am 帝 王 Vs 塘鵝
昨日賽果
騎士 119:112 公牛
魔術 125:121 籃網
塞爾特人 110:89 紐約人
木狼 107:130 溜馬
拓荒者 103:93 塘鵝
快艇 102:84 爵士
前者主場；資料只供參考