梁國威街場踢到入港超夢圓想做好老竇
在街場踢波，幻想自己化身為著名球星，相信是不少愛踢波之人的必經之路，但最終能以夢想成為自己職業的人少之又少，幸好，今夏轉投夢想FC的梁國威（孖指）得以成為其中一人。沒有接受過正統訓練，但「孖指」由丙組地區聯賽慢慢打滾到現在的港超聯，足球夢已圓，或許將來因家庭增添新成員掛靴，亦可說無憾！
梁國威的足球事業，由朋友叫他一起參加選拔開始，最初他只是抱住「去玩吓」的心態「陪跑」，誰不知最後反而獲得錄用，結果由2006年開始踢丙組地區聯賽，效力屯門4個球季後，成功協助球隊升上甲組（當時的頂級聯賽），之後他曾獲得東方沙龍青睞，雖然上陣機會不多，「孖指」坦言已很滿意自己的足球事業︰「始終我同其他人差好遠，好似隊中嘅年輕球員咁，佢哋十幾歲已經開始練波，我就廿幾歲先開始。東方係大球會，我踢唔到正選，但效力過都好滿足，叫做攞過一個銀牌同足總盃冠軍。作為一個踢街波出身嘅人，又唔係特別出色，都攞到兩個冠軍已經好好。」
2015年轉投夢想駿其，並協助球隊取得不錯表現及評價，相隔兩年後再與相近的班底為夢想FC打拚，「孖指」對球隊投下信任一票之餘，亦感謝主帥梁志榮過往給予他的支持︰「我覺得呢隊波比兩年前嘅分別，係更有活力，因為球員更加後生，仲要有陳偉豪呢啲老大哥喺度。」
感激「細榮」畀機會
「孖指」續說：「對我足球事業影響最大嘅就係梁志榮，佢改變咗我對足球嘅理念同思想，肯畀機會我改。『細榮』一開始就話，成績唔係最重要，要睇吓個過程，佢好肯畀機會年輕球員，可能佢哋喺其他隊唔會有機會出場，喺呢度就有，因為『細榮』會畀時間同空間佢哋進步。」
囡囡10月出世湊成「好」字
經常聽見一句說話︰「傷患是足球員最大的敵人」，但其實家庭亦可能是足球員第二大敵人，梁國威與妻子「阿Fi」在2015年誕下「Bean仔」，現在正準備迎接「Bean妹」來臨，預產期為今年10月26日。「孖指」表示要再視乎情況，再決定下季會否繼續踢下去︰「下年個仔要返學，要睇吓自己際遇點，我未肯定會唔會繼續踢，因為始終家庭最重要。BB一出世嗰幾個月就唔使瞓，其實都幾影響，喺屋企要幫手做家務同湊小朋友！」
梁國威亦透露，囝囝今季曾當球僮，跟他在賽前出場︰「我估佢都好鍾意足球嘅，之前帶佢出球場佢好開心。有時喺屋企佢會叫我睇足球，不過其他球類或者運動項目就唔會，希望佢第時大個都會鍾意足球啦！」
本周賽程
9月23日（六）賽馬會社區盃
傑志 Vs 東方龍獅
旺角大球場 下午5時30分
$80、$30（特惠票）
9月24日（日）高級組銀牌賽
標準流浪 Vs 夢想FC
斧山道運動場 下午2時30分
$80、$30（特惠票）
R&F富力 Vs 理文
青衣運動場 下午5時30分
$80、$30（特惠票）
圖/文：何彥霆