鐵血主帥逼出球員飢渴感 大岩剛發功幫鹿角翻生
新官上任三把火，季初戰績未如人意嘅日職傳統勁旅鹿島鹿角，自名宿大岩剛接手即谷底反彈，聯賽6仗未輸過更贏咗5仗，佢話最緊要識「發功」，逼出眾將對比賽嘅飢渴感，到底點樣「發功」呀？
上季勇奪日職總冠軍及日皇盃，並喺世冠盃決賽加時以2比4惜敗畀皇馬嘅鹿角，今季頭12仗聯賽輸5場搞到徘徊中游，仲喺亞冠16強畀ＦC廣州淘汰，主帥石井正忠黯然「落鑊」，由球隊名宿大岩剛執爛攤子，佢接手後聯賽即5勝1和未輸過，連盃賽更係8場不敗，大岩剛話最緊要令球員明白，冇人係必然正選，激起內部良性競爭，只要佢哋保持對比賽嘅飢渴感，離成功就唔遠。
鈴木優磨同C朗踢波堅興奮
講到近年好多日本球星外流歐洲頂級聯賽，大岩剛認為依家班「瀛男」身體較為強壯，比上一代較容易同歐洲人抗衡，佢就睇好隊中嘅鈴木優磨、安部裕葵及三竿健斗有能力出去搵食。
獲大岩剛睇好嘅靚仔前鋒鈴木優磨，今季聯賽暫只入得兩粒，受訪時都話要入多啲波先吸引到歐洲球隊，有信心下半季狀態會返晒嚟。呢位自細就視C朗為偶像嘅新星，回想上年世冠盃決賽同偶像同場較技堅興奮咁話。
昌子源目標3冠再諗出國
至於後防新星昌子源，就揚言下半季目標係幫鹿角做「3冠王」，贏晒聯賽、日聯盃同日皇盃，先諗會唔會出國搵食。呢位日本國腳話只要8月尾世盃外贏澳洲就出線，坦承有啲壓力，但會全力搏盡，並有信心Keep住水準喺國家隊企穩陣腳，亦會向老大哥、效力修咸頓嘅中堅吉田麻也多多學習咁話。
袁志浩日本直擊