賽車場上嘅焦點有人認為係刺激嘅賽事，亦有人認為係參加賽車嘅車輛，不過相信唔少人同小弟一樣認為最吸引係性感迷人嘅賽車女郎，好似徐妍書就係其中之一，佢擁有一副火辣身材，經常喺賽道上散發艷光，然而當佢化身成文青女時，卻又予人與別不同嘅味道。
韓國唔少賽車女郎都係出身於平面攝影模特兒，當佢哋累積到相當嘅演出經驗後，就會轉戰車模界或賽車女郎界。不過徐妍書就啱啱相反，甫出道就以賽車女郎身份示人，喺賽車場上活躍咗一段時間之後，才進軍模特兒界及車模界。點解佢會與別不同呢？咁就要從佢入行嘅經過開始講起。
事緣喺2012年，當時佢觀賞一場喺首爾舉行嘅賽車比賽，期間佢被模特兒事務所嘅經理人睇中，問佢有冇興趣做Model，而妍書以為對方只係講笑，留下聯絡電話後好快就將呢件事拋諸腦後，卻估唔到過咗冇耐真係收到對方嘅電話，當時佢從事白領工作，卻又覺得做Model應該幾有趣，於是決定試一試，佢問經理人點解會揀中自己，對方就話佢擁有剛柔並濟嘅氣質，可塑性相當高，就係咁樣，妍書便成為模特兒界一員。起初佢都以為會先做吓平面攝影模特兒嘅工作，卻估唔到首次登場，就係喺首爾賽車場以賽車女郎身份亮相，佢坦言第一次演出非常緊張，企喺賽道上時腦海一片空白，只係記得經理人同佢講要保持笑容，而佢憑住火辣嘅身材同甜美嘅笑容，成為賽場上嘅亮眼焦點。自此之後，妍書人氣急升，接住喺多個賽車比賽及車展都會見到佢嘅身影，並奠定佢喺賽車女郎界嘅地位。
對於一位初出道嘅賽車女郎嚟講，能夠喺短時間做出如此成績，相信已經感到滿足，不過妍書並未因此而沾沾自喜，更認為仲未發掘出自己嘅潛力，於是佢向事務所提出轉戰平面攝影界，難得佢主動提議，事務所當然答應啦！踩入平面攝影界之後，正如佢自己預想嘅一樣，挾住人氣賽車女郎身份，不但獲得相當多嘅工作機會，仲可以嘗試唔同嘅造型，有冷艷亦有清新嘅扮相，而講到令佢最印象深刻嘅造型，係一次攝影工作中，佢化身成一位女文青。佢笑稱自己並非鍾意睇書嘅女性，莫講話佢自己，就連身邊嘅人都唔覺得佢冇任何一個地方同文青扯上關係，不過當時嘅攝影師卻表示，鏡頭下嘅佢可以展現出箇中味道，於是佢決定接下呢個工作。之後佢睇番相片，亦嚇咗一跳，原來自己竟然可以展現出文藝氣息，唔單止對呢輯照片感到相當滿意，亦對呢次造型最為印象深刻。
不過正當佢喺模特兒界全力發展嘅時候，卻發覺自己嘅健康出現問題，原因係工作太過忙碌，導致壓力過大同缺乏休息，為咗可以平衡工作同生活，佢惟有減少工作多啲休息，並抽時間去旅行，好讓自己能夠放鬆心情。希望妍書身體健康啦！
出生地：首爾
身高：168cm
三圍：34、24、34
簡介：徐妍書玲瓏浮凸嘅身材固然令人眼前一亮，而佢出眾嘅氣質同樣叫人一見難忘，難得佢化身野性艷女又得，變做純情文青亦冇問題，如此可塑性高嘅模特兒，試問又點會唔成為大家心目中嘅女神呢？如果想了解佢多啲，就要Click入呢個網站睇睇。
網址：http://cafe.daum.net/Seoyeonseo
撰文：魂