幾時捧英超？高普頭痕嗌Come On！
英超亞洲盃將於19及22日舉行，4支參加球隊中，利物浦肯定係風頭躉，其中一位最具人氣並非球員，而係領隊高普。雖然於昨晨才落機，但呢位領隊魅力非凡，風趣幽默又言之有物，難怪記者都變晒小粉絲！
首次來港嘅高普，話香港係好靚嘅城市，而且街道好特別，佢仲好搞笑咁講：「今次大家唔准問轉會、球員同有關我嘅問題！」引到現場哄堂大笑。對於今次賽事，高普非常重視，視之為嚟緊歐聯外圍賽嘅重要熱身：「香港比較濕熱，係個操起球員狀態嘅好地方。對於打入歐聯分組賽，我哋好有信心。」對現時足球營運生意搞得愈來愈大，佢就話想紅軍對足球保持熱血和單純，認為呢個先係爭取佳績嘅不二法門。
2015年10月，高普正式成為紅軍領隊，佢對利物浦市非常喜愛：「嗰度嘅人個個都好Nice同有趣，而我亦好鍾意利市著名嘅音樂。不過因為個個都識我，所以我淨係可以出去食餐飯就返屋企。」
球星炒貴非能控制
當被問到幾時先可奪英超冠軍，佢好搞笑咁講咗句「Come On！」，話希望可以快啲：「依家球隊實力不俗，只要逐場逐場去表現出應有實力，係有機會挑戰錦標，循序漸進係最重要嘅。」對於中超以高人工吸引球星加盟，高普認為球員於巔峰時間去踢中超無可厚非，只要努力操練，去到邊依然有發展空間。
對於今個轉會窗球員被愈炒愈貴，其中基爾獲加就值5,000萬鎊，高普就話：「英超球會的確係比較富有，球員身價唔係我可以控制。」記招結束後，記者們都變晒粉絲，紛紛要求高普簽名同合照，可見呢位德國籍領隊的確係Charm到暈。