亞洲劍神潮講波鞋睇漫畫 張家朗：唔再輸畀脾氣！！

90後怕醜仔原來堅Talk得

作為香港史上首位劍擊亞錦賽個人賽冠軍，張家朗2016年一「刺」成名，之後接連為香港劍壇創下新紀錄，如里約奧運花劍16強、世青冠軍和成人世界盃銅牌等。雖已榮升「亞洲劍神」，上月剛剛踏入20歲的90後「家朗」，其實與時下一般年輕人無異，一樣喜歡漫畫、波鞋，一談到自己喜歡的話題，就會一改平日「怕醜」寡言的性格，像隻「開籠雀」說個不停。「我細個其實好靜，唔係太識同陌生人對話，大個咗開始好少少，特別講到我有興趣嘅，好似波鞋、海賊王，或者運動，我都可以好好傾。」

場外最愛韓流打扮，但一換上劍衣，張家朗就完全沉醉入劍擊世界。今日的他在場上很沉實，但原來他曾經是一個愛發脾氣的運動員。「印象最深刻係16歲出戰德國站成人比賽，只要打贏嗰場就可以入64強，本身領先，但因為自己發脾氣最後輸咗，之後慢慢學識控制情緒，依家打比賽已經好好多。」

「我份人都幾硬頸，對自己好有要求，比賽時刺中一個無分嘅位置，我就會好嬲自己。」轉為全職運動員已經4年，無論體能、技術和心態，張家朗都認為自己有大進步。雖然已經正式告別青少年賽場，但「家朗」坦承，他自覺仍是一個「細路仔」：「心態上，我覺得自己仲係小朋友，仲有好多時間可以去衝，所以唔會畀自己太大壓力，打到上去就打，打唔到就下次嚟過。」

張家朗（右）今年亞錦賽衞冕失敗，但信心無減。	「家朗」希望於世錦賽打出驚喜。	年紀輕輕戰績彪炳。

世錦賽目標至少入8強

經歷亞錦賽主場衞冕失敗，張家朗已經收拾好心情，準備向7月19日在德國開打的世界劍擊錦標賽邁進：「我之前世錦賽個人賽最好成績係16強，今次目標係入到8強，我喺世界盃俄羅斯分站拎到銅牌之後，其實信心提升不少，希望世錦賽頭3名並不是夢！」訪問期間自稱「細路」，但這位「亞洲劍神」對自己未來目標明確，讓我們一起期待張家朗為香港劍壇帶來更多驚喜！

張家朗 Profile

出生日期：1997年6月10日

年齡：20歲

身高：1米93

體重：79公斤

威水史：亞洲錦標賽花劍冠軍、里約奧運花劍16強、青少年世界盃花劍冠軍、世界青少年劍擊錦標賽花劍冠軍、成人世界盃俄羅斯站銅牌

圖/文：王藝霖