今屆「瑞士豪度錶足總盃」4強席位，由現時港超「Big4」東方龍獅、傑志、冠忠南區和南華包辦，戲碼堅勁！明天（29日）先由傑志火併冠忠南區，而周日（30日）則輪到「南東大戰」，今天《花生擂台》找來4隊的球員，除了跟各位球迷做賽事分析外，亦會談及自己「最期待嘅畫面」，且看那位「預言」最準！
今季已有高級組銀牌一個錦標在手的傑志，在下周六（6日）的港超聯冠軍戰對東方龍獅前，先要在明日足總盃4強對冠忠南區，爭入下月14日的決賽。對於明日一戰，傑志中場林嘉緯坦言「難踢」:「冠忠南區下半季表現好好，喺聯賽更多場保持不失，加上對親我哋都特別有計，足總盃又係佢哋今季唯一奪標希望，預期呢場比之前對佢哋會難應付！」
將於6月27日迎娶女友「Sa姐」的「嘉緯」續稱：「不過講氣勢我哋都唔弱，今場亦會有啲特別部署，盡量減低對手反擊威力。我同『均宜』都覺得呢場會多波入，至於我最期待嘅畫面就係，傑志最後憑一個靚罰球贏波晉級！」
上場對東方龍獅才被打破2017年聯賽不敗身的冠忠南區，中場主力「握手哥」梁子駿則強調傑志是港超中實力最強一隊，他謂：「傑志有幾勁唔使我講大家都知，特別係去年底轉咗343陣式後，進攻更具侵略性！不過點具威脅都好，傑志今季喺聯賽唯一敗仗，就係輸畀冠忠南區，所以我好有信心，殺入決賽嘅會係我哋！」至於「最期待嘅畫面」，「握手哥」雀躍預言：「冠忠南區喺一輪激戰後贏1比0，入波嘅係我！（會否第一時間同老細握手）到時話你知！」
聯賽次循環南華與東方龍獅合演「入球騷」，周日兩隊狹路相逢！對於南華殺入決賽的機會，後防大哥陳偉豪十分得體地回應：「講真，東方龍獅係強，但佢哋近排征戰咁密，兩條戰線唔易應付，球員傷疲問題唔多唔少都有啲，所以我估佢哋嘅陣容未必會『夫添』，間接提高咗我哋贏波機會。論配搭東方龍獅的確比我哋好，我哋贏唔贏到就好睇發揮，睇臨場啦！五五波嚟嘅！」問到最期待畫面，「偉豪」稱：「我記得10年前季尾『上山』就係踢足總盃，有場4強戰踢到加時贏波，希望10年後嘅今日可重溫舊夢，如果入埋波就梗係最好啦！」
8強戰對九巴元朗射入「世世世界波」的東方龍獅中場「傻邦」梁振邦，賽前提醒隊友勿輕敵：「雖然南華近況麻麻，但每次對親東方佢哋都特別醒神，何況佢哋華將有一定實力，我哋要小心應戰。」「儍邦」表示球隊當前最大敵人其實是自己：「與其問我哋有咩部署，不如問我哋點去恢復好過，近期踢得密兼硬仗連場，大家都攰，所以點樣減低傷疲對我哋嘅影響，先係最大關鍵。（最期待嘅畫面係唔係再入世界波？）唔使客氣喇，如果能夠將朱兆基Mark到一戙都冇就最正！嘻！嘻！」