1分夠「上岸」標準灝天死守R&F富力
隨着主要護級對手港會，昨晚作客旺角場不敵傑志，標準灝天今午只要在R&F富力身上取得1分，基本上已經可以達成護級目標。「希望一眾球員今場可以搏盡，只要保住不敗，便可以提早上岸，我對一班手足好有信心！」標準灝天領隊招重文謂。
（周六下午2時30分小西灣運動場開賽）
招重文：五人中場抗敵
雖然標準灝天去仗在主場搶分失敗，1比5大敗於傑志腳下，不過因港會昨晚同遭「藍鳥」吞噬，令到今仗賽前排在尾二的標準灝天，與包尾的港會仍然維持2分差距。「只要呢場我哋攞到1分，就算港會最後一場贏到香港飛馬，而我哋之後1分都攞唔到，最後兩隊同分都好，我哋都可靠較佳對賽成績壓住對手，唔使包尾降班！」「文仔」表示。
由於今場1分已足，「文仔」預言球隊在部署上會偏重防守，美高和艾華頓會復任正選，與郭子堦、李吉勳和廖培楓組成五人中場，而上場先任後備的前鋒韋狄，則會擔正攻堅。「為求1分，我哋呢場擺明會以為守為先，特別會睇實主隊射手卓耀國，只要將佢嘅威脅減到最低，我哋就有望達標！」招重文再三強調。