迷失！轉型！再拚過……張國明：我仲踢緊波！

2012至2014年效力晨曦時，張國明一直是正選名單常客，但轉會傑志令他面對強大競爭，因表現未達要求失去上陣機會，「明仔」坦言曾經迷失過，放縱自己甚至缺席球隊操練。猶幸他對足球仍有團火，及時茅塞頓開：「如果自己再咁搞落去，冇球會搵我踢，我係咪要轉行？我覺得自己仲有能力踢，雖然留意同支持我嘅人唔多，但我踢得好自然會有人留意。」

移入中路搵到最佳位置

季前得悉有機會加盟R&F富力，即使人生路不熟，他亦毅然答應，原因只有一個：「我好簡單，冇足球就冇我，我只係想繼續踢波。呢兩年出場少，好多人以為我冇踢波，我想向大家證明我仲踢緊波！」

「明仔」踢慣翼鋒，季初在R&F富力因「有上冇落」未能爭取到正選，其後教練將他移入中路，他似乎開始找到自己的「最佳位置」，月初對港會一仗交出助攻助球隊贏波，漸漸坐穩正選位：「初時並唔習慣，以前面對面扭人，依家要背住對方嘅外籍球員，但反而感覺自己變得更硬淨。加上同隊友配合、走位夾得唔錯，踢呢個位置對我嚟講係新嘗試，希望可以創出一番新天地，重新出發。」

R&F富力前鋒 張國明	張國明希望取得入球送女友。	「明仔」（藍衫）決心在R&F富力重新出發。

爭取機會負傷照頂硬上

並非前鋒出身的「明仔」笑言自己射術有待改進，更指已有長達兩年的「入球荒」，因此剛過26歲生日的他希望自己今季可射入3球，除了幫球隊搶分，亦想將入球送給經常入場支持自己的女友。

用自己努力換來正選位置，「明仔」當然珍惜，縱使半月板受傷，依然每場波「頂硬上」，更延遲手術以爭取上陣時間：「每場我都盡力做到100分，因為唔知仲可以踢到幾時，想捱過呢季先做手術，依家擁有我渴望咗好耐嘅正選位置，我唔想浪費時間！」他希望用這一季彌補近季錯失的機會，為自己大踢爭氣波。

張國明 R&F富力前鋒

出生日期：1990年12月23日

身高：1米73

曾效力球隊：公民、港菁、晨曦、傑志

今季聯賽上陣/入球：7/0

圖/文：袁志浩