同心同步同樂日節目豐富預埋你
96年奧運風帆金牌得主李麗珊為港奪得奧運首金後，一句「香港運動員唔係垃圾」感動全港，這位「風之后」昨與同年殘奧輪椅劍擊4金得主張偉良，及88年奧運勇奪羽毛球混雙銅牌的陳念慈，將獎牌交予香港賽馬會，用作「同心同步同樂日」展覽用途，「珊珊」回想奪金一刻仍覺「好激」！
3位香港體壇傳奇人物昨日聚首一堂，將珍藏多年的獎牌交到香港賽馬會行政總裁應家柏手中，「珊珊」更再演繹當年「金句」：「當年自己為啖氣，要證明『香港運動員唔係垃圾』，諗番當時呢句說話，都幾激喎！」她坦言這面金牌意義極大：「嗰陣係96年，97回歸將至，大家都唔知會發生乜嘢事，但就有個人帶到件喜事畀全香港。」陳念慈則表示88年奪牌時，香港全職運動員不多，自己在國際體壇創出成績，證明踏上全職之路的決定正確。
朴智星沙田馬場教踢波
連續第2年舉行的「同心同步同樂日」，將於3月25及26日在沙田馬場及彭福公園舉行，「珊珊」昨日親身示範其中一個運動遊戲「發電單車」，陳念慈亦與雪特蘭小馬近距離接觸；除此以外，曼聯名宿朴智星下月將親臨沙田馬場，不但與小朋友切磋球技，又會與家長分享支持子女踢波的心得，節目內容非常豐富。
