陳婉婷演活「丸姐」當自強

「好記得有場世界盃外圍賽，碧咸補時主射罰球幫英格蘭出線（對希臘），真係型到爆。」10個女生有9個花癡碧咸的萬人迷帥氣，偏偏牛丸卻立志模仿偶像的「七旋斬」，瞞着父母參加足球暑期計劃。「後來投考青少年足球領袖計劃，都係諗住教波當兼職，最多畢業後做個體育教師。」

選修地理及與資源管理，牛丸的大學時光幾乎也用來練波教波，最令她引以為傲的學業成績也與足球拉上關係。「我用咗從地理角度看香港職業聯賽可行性寫畢業論文，可能professor都唔係好明，結果拎到最高分。」回想那些年，牛丸不禁大笑，釋放了接任主帥後的沉重壓力。與足球緣分早定，直至出任天水圍飛馬技術分析員，在眾男尷尬目光之中走入更衣室，協助教練陳曉明講解戰術。從未有港女實現過的夢想，終在牛丸心底札根，逐步報考亞洲足協教練課程，在男人圈中以才服眾。

以才服眾 冇受歧視

「上任之後3場全勝，但壓力依然好大。銀牌4強對南華前一晚，完全瞓唔着。」牛丸每日收操與東方助教團檢討訓練成效，回家立即準備教案剪片部署，「球員練波着邊隊背心、企咩位，都要mark得好清楚。其實香港好開明，我喺球圈6年，從未受過性別歧視，反而去其他地方集訓，會奇怪點解會有個女教練。」牛丸笑言會護膚，除了碧咸，近期男神是單車電影《破風》中的彭于晏。所謂男仔頭，其實也好「女仔」。「初初畢業EQ冇咁高，試過畀球員激親，覺得委屈喊咗出嚟，諗番都覺得低能。」

最唔方便 冇更衣室

天水圍飛馬失盃、太陽飛馬散班，牛丸也曾偷偷喊過。惟決心，卻未曾動搖。「自己也是從錯誤中學習。原本預計在30歲後才達成的夢想早到了，更加要好好珍惜。」收起眼淚變硬淨，與球員的相處，卻未因角色轉換改變。「羅志焜及黃展鴻曾叫我畀啲威嚴，依家會完晒操練先至講笑，球員亦會用行動表達對我嘅支持。」

如何在球場上平衡女性溫柔，「牛丸」早已駕輕就熟，「唯一唔方便，就係冇更衣室沖涼」。女人能頂半邊天，小小的考驗，可難不到她。

文/圖: Kaka