李永波25年樂在其中
傑志近5季狂掃9項主要錦標，王朝之下教練團、球員換了又換，唯獨球隊管理員李永波，無論日曬雨淋、身處石門或吉蘭丹，搬運裝備的身影仍長伴左右。在不同球隊擔任同一職務25年，贏得各方尊重。這位「元組級」管理員希望在傑志「做到做唔到為止」，繼續隨軍走過高山低谷。
綽號「波記」的李永波，以前從事運貨工作，40多歲時曾隨家人移居加拿大，卻因不適應當地生活回流。自小愛看香港足球的他，91年在朋友介紹下到快譯通工作，之後服務花花再到現時的傑志，同一崗位一做就逾25年；「波記」講起多年來與球員的情誼，仍津津樂道：「球員差唔多個個都Friend，愛華士好波又靚仔！我最鍾意李安納，佢仲會教我點訓練小朋友，列文到依家仲會打電話畀我！」對於教練的「特殊癖好」，他亦瞭如指掌：「郭家明每日都要一箱橙，唔知點解日日都要食橙。」
年屆70做到唔想停
身為管理員，「波記」每日在背後撐起球隊運作，亦要隨隊遠赴海外作賽。70歲的他未言倦，笑言「每到休季就想搵兼職」。享受工作，除因已習慣每日返工、到相熟的「忠記」吃飯、回家照顧孫兒、早睡早起的簡單生活，亦因視傑志為家庭：「除太太、子女及孫兒外，香港冇乜親人，傑志好似屋企人咁，日日都見住班大細馬騮，好好玩！」
自言「雙槍將」的「波記」偶爾會騷球技，在球圈浸淫多年，對球員評價更是一針見血，被戲稱「傑志總軍師」的他，講到某些比賽仍難掩喜怒：「好似（夢想）駿其嗰場，場地已經難踢，不過唔夠人打，輸就輸啦！銀牌（上季決賽）對東方就唔同，輸得條氣唔順……最興奮就係上季贏東方4比0嗰場！」賽後與球員牽手慶祝時，「波記」開心得雙眼發光。無論傑志成績如何，「波記」一於默默相隨：「做到自己認為唔做得，或者老闆唔請我為止！」
圖／文：Eden