不丹之旅終告結束，今程最大收穫梗係港隊贏波啦，完場當晚PAM holidays為港足搞咗個「慶功宴」，賽前承諾麥基入波就請飲啤酒嘅麥爸爸照樣痛飲一番，之前大家睇唔起不丹，但踢過之後大家都覺呢場勝仗得來不易。
前南華教練路爾斯曾經講過：「No easy game！」你睇唔起人，就要先問自己有乜資格先？其實呢場波幾乎就係早前中港大戰翻版，只係換轉角色，港隊由對住中國死守變為對不丹搶攻。
至於另一收穫就係健康，同行唔少團友都話，不丹空氣零污染，鼻敏感好番晒，小記臨走前都不禁大力索多兩啖清新空氣，返到香港仲可以同人講：「除咗瑞士山區肺，不丹山區肺都好靚o架。」