不丹隨街都係慕容復!

香港人來到不丹，其實心情好矛盾，因為先進與落後反差真係好強烈，不丹機場建在山谷中，飛機升降令人諗起90年代之前啟德機場升降嘅驚險場面，而不丹民眾衣着就好似拍古裝片咁，女士穿民族服飾長裙，男士就成件古代武士服咁，尤其我哋個導遊Kezang都幾似石修，再着埋古裝，簡直係「慕容復」翻生。

落後有落後嘅好，至少飲水喉水都係純天然，唔使驚含鉛超標先啦，但都市人唔多唔少都有「手機依賴症」，不丹手機數據仲係用緊3G，而且規定買電話卡一定要當地人身份證副本，網絡速度唔夠快，要即時報道港足情況，確實係有難度。