虎哥投流浪延續足球夢
隨着港甲冠軍駿其天旭放棄升班、和富大埔因「莫財」未接受足總挽留，而黃大仙亦遲遲未表態繼續參賽，不僅令新一季港超聯參賽隊數受到影響，並導致大批失業球員湧現。不過「有人辭官歸故里，有人漏夜趕科場」，正當有老將為求延續足球員生命，不惜投效「青春班」之際，亦有盛年球員為免再受傷患困擾，選擇提早掛靴轉行。現在就由李志豪和白榮澤，為大家分享他們「漏夜趕科場」和「辭官歸故里」的故事。
上季後不獲東方留用的李志豪「虎哥」，因在香港隊主場2比0擊敗馬爾代夫的世界盃外圍賽中表現出色，令其名字一度與多支勁旅扯上關係。但至本月中列強先後開操，都未見其蹤影，原來李志豪已經加盟標準流浪！
上月中記者相約「虎哥」用膳，當時他還叫球迷不用擔心：「我OK，大家放心喎！」並深信會有球會懂得欣賞他，不擔心「無班落」影響其繼續獲港隊徵召的機會。但原來自信心十足的「志豪」，也一度為前途擔心過，他謂：「初頭真係好有信心，喺香港隊場波表現OK，加上有幾位球圈好友為我搭路，諗住應該冇問題啦！點知之後出現咗啲變化，等吓等吓得個等字，令我一度好認真咁去為退役打算。」李志豪憶述期間，不忘向幾位曾出手相助的好友及一路支持他的球迷致謝。
望繼續踢港隊
直至本月中，「懂得欣賞他」的球會終於出現，李志豪說：「有日『加菲貓』（即標準流浪總監李輝立）打嚟問我點，約我食飯，仲叫我去佢哋度練吓波，Keep吓狀態，我見無嘢做咪去操吓囉！操咗幾日，佢好有誠意問我有無興趣踢流浪，條件亦唔錯，就係咁我簽咗喇！」
過去在港効力南華和東方的「志豪」表示，雖然標準流浪非爭霸分子，但會長莫耀強熱愛足球，球會會所設備亦很好，深信自己作了正確決定。「我11月就33歲，流浪肯簽我好開心，能夠有班落等港隊可以繼續選我，更開心！」此時「虎哥」露出久未展現的笑容。
文：戴陶蔚