大隻佬惠龍兒日擦12碗飯
超級工商盃國際籃球邀請賽今日在灣仔伊館開鑼，東道主香港隊努力備戰，除咗練波仲要練大隻！港隊內線主力惠龍兒（Duncan Reid）為今次賽事積極增磅變身「大胃王」，飲食餐單中包括日食12碗飯，體重激增至超過240磅，佢話內線球員打國際賽一定要夠重磅，才有足夠力量守護港隊籃底。
25歲的惠龍兒是加拿大香港混血兒，外表9成似外國人，但廣東話流利，亦有一夥守護香港的心，為打好港隊賽事不惜增磅變「巨人」。但其實佢飲食好有節制，唔係亂咁嚟：「未增磅前只有180磅，為守護籃底於是決心增磅，按營養師建議計算每日攝取卡路里分量，加上勤力練習，所以成功增磅之餘，身體仍能保持靈活。」
身高2米05的Duncan增磅餐單的食物種類其實同大家日常飲食相差不遠，不過分量就大得多，他說：「我每日進食4至5餐，大約食12碗飯或同等分量的意大利粉、8隻雞蛋、足夠分量的牛扒及雞肉，另外仲會飲用補充奶粉，結果重咗60幾磅，不過從外表看上去，我不算是肥仔吧。」
港隊今首仗迎戰新加玻
港隊在今次賽事與新加坡、泰國及湖南省柏寧同處B組，各隊實力接近，教練鄭學來期望港隊能夠團結一致，以小組出線為目標：「新加坡及泰國都是國家隊，球員可專心訓練，湖南省柏寧亦有身高優勢，反觀港隊大部分球員都是兼職打波，平時練波都要在晚間8、9點後球員放工後，值得慶幸的是各隊員都願意為港隊付出，期望他們在今次賽事打出水準，力爭佳績。」
優品360°超級工商盃籃球邀請賽
日期：1月27日-29日(分組賽)、1月31日及2月1日(4強及決賽)
地點：灣仔伊利沙伯體育館
門票：單日$60(套票$150)
發售地點：城市電腦售票網
今日賽程
2:00pm 湖南省柏寧Vs泰國
3:30pm 中山籃協Vs馬來西亞
6:00pm 開幕禮
7:00pm 香港Vs新加坡
8:30pm 南加州福建同鄉會Vs廣西威壯