鳥巢安排失禮阿巴大戰
阿根廷同巴西嘅超級熱身賽聽晚會喺北京上演，不過主場鳥巢就認真失禮，畀傳媒踢爆招待美斯、阿古路同迪馬利亞等巨星嘅更衣室設備簡陋兼污糟邋遢，形同垃圾站！至於鳥巢場外豎立嘅美斯同尼馬等6位球員雕像亦畀阿根廷報章寸「好假」兼樣衰。而「森巴大軍」連日身邊總有位大隻保鏢傍住，原來佢大有來頭，曾經保護過唔少歐洲皇室包括英國王儲查理斯，所以巴西可以專心備戰，主力尼馬前日仲喺練習嗰陣省入4粒添！
場外雕像被彈冇個似樣
為迎接「阿巴決戰」，主辦單立喺鳥巢場外設置6個球星雕像，阿根廷代表係美斯、馬斯真蘭奴同馬高斯盧祖；巴西代表就係尼馬、大衞雷斯同冇入選嘅堤亞高施華，不過呢6個雕像完全唔似真人，而且個個差唔多樣，就連阿根廷《奧萊報》都寸爆：「冇一個雕像似樣，呢6個人似係同1個人。」雕像整得差都算，但用嚟招待一班阿根廷嘅專用更衣室竟被發現非常簡陋，只得1張台、2張按摩床、1部水機同1排摺櫈，而且地下仲有一撻撻濕嘅泥濘冇人清理，飲完嘅水樽亦隨處都係，十足十垃圾站！
超弗尼馬分隊賽入4粒
至於巴西隊抵華後無論喺機場、球場定餐廳，總有位大隻保鏢傍住，原來佢曾經保護過唔少歐洲皇室，包括英國王儲查理斯。巴西隊每到任何地方，當地所有保安細節佢都會問到足，而且把口勁密實，冇透露過自己個名同巴西隊嘅秘密，果然夠專業！多得佢睇實，一眾巴西球星可以安心練波。喺前日首次全員訓練中，狀態大勇嘅尼馬先喺馬騮搶球環節零失誤，再喺分組練習賽攻入4粒，睇嚟呢位巴西射手已經準備好對阿根廷時「數胡」。