「顧家男」馬高仔女友囝囝紋上身

「新派路」想識香港friend

首次嚟到香港嘅馬高華拉堤昨日接受本報訪問時，大讚香港係動力之都，有多好事物可以做，仲話想試吓地道美食同結識香港女仔添！不過大家唔好誤會，馬高仔唔係想玩「異地情」，只係歐洲少見華人，所以先想搵番個香港friend。況且呢位21歲新星明言自己已有一位青梅竹馬嘅女朋友，仲為佢生咗個囝囝叫Tommaso，所以馬高仔前臂就紋咗囝囝個名，手臂內側嘅嘴唇圖案，就代表女友親吻，另外上臂仲有一幅大型圖案則代表家庭，加埋其他位置同朋友有關嘅紋身，令馬高仔落場比賽時，有如帶埋親友一齊奮勇作戰。

雖然身高只有1米65，但馬高華拉堤憑超卓球賽閱讀能力及精準傳送，穩佔聖日耳門正選位置，亦由於踢法同派路相似，被外界捧為「新派路」，喺剛結束嘅巴西世界盃，馬高仔有份為意大利出戰，佢承認國家隊分組賽出局，令全國好失望，但正因為咁現時更加需要團結，助球隊走出難關。另外有傳前祖雲達斯教練干地將執教意大利，佢亦表示支持。

講到鬥傑志場波，呢位小巨人坦言對對手毫無認識，但一定會認真比賽，畢竟球隊今次係為備戰法超盃及新球季而來，喺嚟緊嘅球季，馬高仔希望助PSG蟬聯法甲冠軍外，最想一舉擊敗皇馬、巴塞、拜仁，為巴黎聖日耳門一嘗歐聯冠軍滋味。

馬高華拉堤小檔案

年齡：21　　　

國籍：意大利

身高：1米65 　

位置：中場

曾効力球會：佩斯卡拉、巴黎聖日耳門

國家隊上陣次數/入球：8次/1球

球會錦標：法甲冠軍2次、法聯盃冠軍1次、法冠盃1次