拿比亞領康大4度登基

年度盛事全美大學籃球賽(NCAA) 昨日上演決賽,康涅狄格大學憑控衞拿比亞(Shabazz Napier)貢獻22分、6個籃板的搶鏡表現,助己隊以60比54險勝肯塔基大學,第4度於NCAA登基,拿比亞更獲「大帝」勒邦封為最佳控衞,身價爆升!至於肯塔基失冠之餘,更可能有教練卡拉柏利(John Calipari)下季過檔NBA執教湖人,可謂雪上加霜。

NCAA決賽有幾矚目,就連NBA都要「讓路」停戰一日可見一斑。本仗更吸引了重量級球迷現場睇波,包括美國前總統克林頓及喬治布殊等,二人更坐埋一齊「講波經」。康涅狄格於上半場雖一度大比數領先,但換邊後肯塔基發力狂追,雙方要鬥到最後一刻才能分出勝負。

獲封MOP 稱禁賽變動力

獲得最出色球員獎(MOP)的拿比亞,表現相當出色,全場攻入22分,成為最大贏波功臣。這位4年生賽後「爆料」,說去年「康大」被賽會禁賽,令一眾球員更有決心去爭取佳績:「各位觀眾,之前賽會不准我們參賽,反而令我們更落力、更爭氣,成就我們今日的一切!」

拿比亞除了當選MOP,更獲熱火「大帝」勒邦占士(LeBron James)激讚為「最佳控衞」。「大帝」在twitter留言說:「今年選秀,冇可能有其他控衞會喺拿比亞之前被選中!」有LBJ睇好,拿比亞無論前途及「錢」途都似錦!

傳湖人睇中肯塔基教頭

另邊廂的肯塔基不但失冠,更有可能會失去教頭卡拉柏利。肯塔基出身的前黃蜂球員卓文(Rex Chapman)於twitter爆料,稱曾在90年代末期帶過籃網的卡拉柏利,將會重返NBA執教湖人,不過這位12年NCAA冠軍教頭已「例牌」作出否認。