得閒嗰陣有冇約埋朋友一齊打吓麻雀呢？雖然呢種牌類遊戲係中國嘅國粹，但喺日本都好流行，當地仲有麻雀聯賽同埋職業選手添！近期再戰寫真界嘅巨乳美人高宮麻里，原來都擅長攻打四方城，面對呢位咁具殺傷力嘅雀友，真係要小心荷包大出血！
前輩教落，想知一個人嘅真性情，同佢打番幾圈就會一清二楚，正所謂「人品好，牌品自然好！」不過，如果竹戰對手變咗高宮麻里，相信人品再好嘅男人都有可能出現「情不自禁」嘅情況。今年31歲嘅麻里，樣貌娟秀，女人味甚濃，求其拋個媚眼，都會令唔少男人冷靜唔到，面紅、心跳加手震，點會集中到精神打牌呢？麻里仲有一個令男人瘋狂嘅賣點，就係一副被雪白肌膚包裹住嘅極品胴體，當中又以一對天然飽滿嘅G Cup美乳最吸睛！
講起呢位甜姐兒嘅近況，原來佢之前休息咗差唔多兩年，最近再次喺寫真界蒲頭，推出嘅寫真碟叫《九寶蓮燈》，由I-ONE出品。乜嘢係「九寶蓮燈」？即係我哋廣東人打牌講嘅九子連環，點解會用嚟做碟名，原來係同麻里嘅強項有關！話說麻里早喺2010年已經開始以職業麻雀運動員身份發展，現時隸屬於KONAMI麻雀格闘俱樂部。至於佢嘅牌技又如何？我諗應該都唔錯啩，皆因佢出道以來喺麻雀比賽贏過唔少冠軍，例如第11屆女流MONDO杯、第8期夕刊富士杯麻雀女王決定戰等等，絕對係美貌與實力兼備！
高宮麻里成日會參與麻雀比賽，亦會為唔同嘅電子遊戲做宣傳，想知道佢最近又喺邊款遊戲中出現，就要多啲留意佢嘅社交網。
網址：https://twitter.com/takamiyamari
年齡：31歲
身高：5呎1吋
三圍：33G-24-34
撰文：賢