高比爆粗鬧侯活
做大佬，立場要鮮明，湖人「大哥大」高比拜仁（Kobe Bryant）喺傳媒見面日被問到「魔獸」杜域侯活（Dwight Howard）跳槽嘅事，感覺被「起飛腳」嘅佢即時爆粗，敵我分明，可能高比嫂見佢咁躁，登時將兩公婆激嘴嘅恩愛相放上Twitter，當堂「皇上息怒」！
無論喺「紫金兵團」抑或屋企，高比都係King，當然忍受唔到被人「飛」嘅卑微感。佢回應傳媒有關「魔獸」離隊「搭火箭」一事時直言：「老實說，我ＸＸＸ根本不在乎這件事！」事實上，眼前高比最緊要搞番好隻腳嘅傷，佢話復出仲要hold住：「我諗至少30日，依家我仲未可以做啲爆發力強嘅動作，我要恢復肌肉力量，至可以落場搏殺。」意味着10月底ＮＢＡ開咧都唔知打得未！
高比嫂「鋪」激咀相降火
至於高比嫂雲妮莎同日喺社交網「鋪」咗張煙韌激咀相出嚟，仲留言話兩公婆啱啱去杜拜為慈善出力，玩得鬼咁開心，相信高比睇到都會「冧」番，所以話，一個成功嘅球星，有個好老婆係好重要o架！
另外，高比喺5年前拍咗個跳車廣告，Hardsell對波鞋個Air有幾勁，近日有位喺印第安納大學讀書嘅小朋友Obi Nwosu咁天真，上星期竟然有樣學樣走去扮「小飛俠」，結果畀架車迎面炒到四腳朝天，慶幸只係整傷個躉，下次唔好搵條命較飛啦！