新季NBA常規賽10月底開鑼，76人新秀路爾（Nerlens Noel）因右膝重創要到12月才亮相，加上季前被列強睇衰導致失落選秀「狀元」寶座，NBA之路荊棘滿途。不過，這位出身自海地貧苦家庭的「防守王」，不時以母親捱夜湊大家中三兄弟的辛酸史自我激勵，決心要令在選秀會向他耍手擰頭的球隊大嘆走寶！
可兼任中鋒及大前鋒的路爾，去年於籃球名校肯塔基大學場均貢獻4.4個封阻及2.1次偷波，早在大學籃球界被譽為「新莫湯保」，有球評家更指若路爾能增磅，NBA未來15年將是其天下。可惜，路爾於今年2月右膝前十字韌帶撕裂，嚇怕了一眾NBA隊伍，「準狀元」慘變第6順位新秀，甫踏足NBA即遇上極大挫折。不過，路爾自言能闖出一片天，並以母親的辛酸史作前進推動力：「做唔到狀元唔係世界末日，諗起阿媽要打兩份兼職維持生計，呢啲算得係咩？」
路爾4歲便由海地移居美國波士頓，任職的士司機的父親約尼爾及後拋妻棄子，母親杜絲娜為餬口焗打兩份醫院清潔工，日日早出晚歸，天未光就放低食物及洗好的衣服在枱上又再外出打工。街坊睇見路爾一家經濟情況差，主動接載路爾返學及幫忙籌錢支付其課外活動費用，高中籃球教練迪拜亞素亦不時買東西畀佢醫肚，艱辛童年令路爾堅定自信，向籃球事業進發。
路爾向《ESPN》稱：「媽媽因為背部勞損，現今已經冇能力打工，所以我一定要喺NBA有一番作為，畀最好嘅生活佢！」身為塞爾特人支持者的路爾，一直視前「綠軍」名將加納特（Kevin Garnett）為偶像，最欣賞「KG」食腦的打法，期望有朝一日能趕上其籃壇成就。
將於12月才復出的路爾，原本想揀選76人的6號球衣，但由於會方已榮休「J博士」艾榮（Julius Erving）的6號波衫，故路爾才揀4號。被問到為何對6號情有獨鍾，該位新秀咬牙切齒稱：「騎士、魔術、巫師、山貓、太陽同塘鵝呢6隊都唔想要我，我希望用呢個數字提醒自己，新球季一定要令佢哋後悔！」
出生日期：1994年4月10日（19歲）
國籍：美國
身高／體重：6呎11吋／103公斤
選秀排名：首圈第6位（被塘鵝揀中，然後交易至76人）
位置：大前鋒／中鋒
肯塔基大學場均數據：10.5分、9.5個籃板、4.4次封阻、2.1次偷波、59%命中率