高比打柴 湖人告急
湖人球星高比拜仁（Kobe Bryant）的老婆雲妮莎（Vanessa Laine）自從幾個月前開通Instagram戶口後就大解放，表面上晒恩愛經常上載溫馨家庭照，實際上就猛咁Show Off自己惹火身材。近日美媒更踢爆雲妮莎曾紅杏出牆偷嗒饒舌歌手AP.9，高比對住呢位人妻認真頭痛，難怪昨日對鷹隊時失晒魂，仲嚴重扭傷左腳足踝，未知何時復出，搞到「紫金兵團」衝擊季後賽任務告急！
曾付姦夫31萬揞口費
現年30歲嘅雲妮莎雖然已係兩女之母，不過依然保養得好好，有樣有身材梗當然要留倩影。這位人妻與不少後生女一樣鍾意玩自拍，上年尾開通Instagram帳戶後，雖然上載了不少與「小飛俠」甚至兩個囡囡的合照，不過都係自拍性感相佔大多數，唔係晒長腿就係逼爆衫的低胸相，自然引死一眾麻甩佬。
雲妮莎樣靚身材正，點會冇狂風浪蝶埋身先？據美國饒舌歌手AP.9早前向《Terezowens》爆料話自己曾經同一名湖人巨星的老婆有一手，事後對方為冚住雙方關係，仲付了4萬美元（約31萬港元）「揞口費」，不少美媒都猜測雲妮莎就係事件的女主角。
投射冇準4分負鷹隊
老婆疑紅杏出牆，老公「小飛俠」仲點可以專心打波。高比昨日對鷹隊雖攻入全場最高的31分，無奈出手33次射失22球，明顯心不在焉，更連累湖人作客以92比96不敵鷹隊。更嚴重的是高比臨完場前一次跳投「差錯腳」，踩到鷹隊後衞丹迪鍾斯（Dahntay Jones），搞到嚴重扭傷左腳足踝，復出無期，令「紫金兵團」衝擊季後賽蒙上重大打擊。湖人明早造訪東岸勁旅溜馬相信很難有作為，溜馬讓5.5分捧上盤。（now 635周六早上7時直播）
本報綜合報道