加納特轉性揸艇？
要數NBA的惡霸，加納特（Kevin Garnett）認了第二，相信無人敢認第一。這位塞爾特人老將最鍾意辣火頭，今季已經與活塞控衞卡特朗（Jose Calderon）及紐約人球星安東尼（Carmelo Anthony）開過波。不過，KG最近一反常態，玩瑜伽兼冥想控制情緒，「火爆中坑」想收火？真係「估佢唔到」！
運動員的職業生涯非常有限，NBA乃高強度比賽，老將想玩多幾年當然要識得保養。已屆36歲的KG最近投身瑜伽行列，自稱最耍家是「DownDog」動作（四肢撐地，尾椎骨朝天形成倒V形）：「瑜伽可以增強柔韌度，有助減少傷患同延長職業生涯，但對我嚟講，最重要係瑜伽同冥想可以有效咁令自己咪再咁衝動，頭腦清晰啲就可以減少場上嘅愚蠢犯規。」
祖斯史密夫另一轉會熱星
「收晒火」的加納特昨日貢獻12分及9個籃板球，奈何「綠軍」傷兵滿營，最終作客以90比97不敵金塊。隨着轉會窗明日關閉，塞爾特人要班兵救亡，有消息指來自加州馬利布的KG有機會「回鄉」加盟快艇，與老死比立斯（Chauncey Billups）並肩作戰，爭奪職業生涯第二隻冠軍指環。至於備受公鹿、籃網、太陽等垂青的鷹隊前鋒祖斯史密夫（Josh Smith），亦屬今次限期前的熱門轉會球員。