鬍瘋＋高比３星齊冧中國粉絲

10年誌慶最強卡士

ＮＢＡ一直致力推動國際化，近年頻頻到世界各地打季前賽，熱火去年就於北京及上海兩鬥快艇，鑑於亞洲籃球迷數量龐大，聯盟決定再接再厲，繼早前與湖人「傾掂數」後，如今再「搞掂埋」另一支西岸人氣隊伍火箭，該隊老闆阿歷山大昨日向傳媒表示：「我哋今年秋天會去中國打季前賽，姚明令火箭吸納咗好多中國球迷，球隊往年去到中國亦有唔少美好回憶，全隊上下都好期待呢次中國之行！」

火箭今季羅致「林瘋」及「大鬍子」後，搖身一變成為ＮＢＡ人氣隊伍，適逢今年是中國賽10周年慶典，聯盟睇準J.Lin於亞洲擁有龐大球迷數量，於是決定力邀火箭參賽。火箭繼04及10年後第3度再出戰中國賽，對手湖人就擁有「小飛俠」、拿殊及杜域侯活等球星，預期屆時勢必掀起一陣撲飛潮。據悉，今次中國賽地點仍有待商討，不過聯盟就計劃安排兩隊去埋菲律賓及台北等地打多幾場，希望盡量滿足亞洲粉絲。

熱火當弗誓焚快艇

另外，昨日火箭縱有占士夏登攻入全場最高的36分，奈何最終仍以108比114不敵主隊熱火，熱火明早於主場恭候有基斯保羅（Chris Paul）續抖的快艇，料可靠近期勇勢再下一城，讓5.5分要上盤。（now 635及廣東體育周六早上9時直播）

本報綜合報道