禪師求婚成功做湖人快婿
「禪師」即將再加入湖人大家庭！昨日是2013‧1‧4，普通話諧音是「愛你一生一世」，在台灣及內地掀起結婚及求婚熱潮，想不到遠在美國的前湖人教練「禪師」積遜亦Sweet到震，被踢爆出動巨型鑽戒求婚成功，將與湖人班主謝利巴斯的女兒珍妮結束12年愛情長跑，重投湖人「懷抱」！消息指「禪師」未來幾日會與籃網商討加盟條件，有望出山重執教鞭，來個雙喜臨門。
現年67歲的積遜與比他細16載的珍妮巴斯自01年擦出火花，雖然珍妮曾在自傳表示不會與「禪師」結婚，只想維持同居關係，但這位湖人副行政總裁昨日突然「晒命」，透過twitter自爆終於嫁得出：「真係好開心，我本來唔想將呢單嘢搬出嚟講，但好多twitter朋友都想知咩事，其實我喺聖誕節已經收到呢隻戒指。」
或出山教籃網雙喜臨門
珍妮巴斯同時向《ESPN》表示，二人尚未決定結婚日期，並坦言不介意積遜執教湖人以外的球隊。「禪師」早前曾因叫價太高令準外父謝利巴斯卻步，未能重返湖人任教，但暫由卡利斯莫領軍的籃網，已表示會不惜一切邀請「禪師」出山。消息指籃網老闆普羅霍羅夫放完新年假後，本周內將會晤積遜並出動銀彈政策邀請他加盟，「禪師」在2013年絕對事業、愛情兩得意。
NBA喜事浪連浪，去年12月做老襯的紐約人前鋒史杜迪米亞，其妻子Alexis昨向《People》透露又再有喜，意味「A米」將會第4度做老竇！