上季球隊得分王基爾健康歸隊，以為係灰熊起飛嘅一季，但又輪到功臣蘭度夫受傷，出席率一半唔到，成季搵唔番狀態，變返一舊爛豆腐。最慘係灰熊首輪第一場對快艇時，第四節開頭領先24分，灰熊教頭諗住畀蘭度夫練番手感，點知佢籃底炒完一球又一球，快艇把握呢個機會打出22比1嘅攻勢，最後反勝一分，係灰熊最後意外首圈出局嘅導火線。
由於蘭度夫表現太差，加上已經簽咗肥約，好多球評認為佢無動力重回巔峰，加上放走天才球員美奧後，令普遍人對灰熊無太大期望。不過今季首場輸畀快艇後，灰熊靜靜地起革命，一口氣連贏8場，當中包括東岸一哥紐約、上屆冠亞軍熱火同雷霆，淨勝分超過11分，而小加素（馬克加素）同蘭度夫嘅表現更令人嘆為觀止。
小加素每場平均攻入15.1分同搶到7.2球籃板，當中傳出4.6次助攻，不但係中鋒入面嘅助攻王，而且助攻失誤比為4.6（即成功助攻4.6次先出現一次失誤），全個聯盟只有神奇叔叔傑特勁過佢！小加素經常企喺罰球線附近做駁腳，擁有出色視野嘅佢會即刻Scan吓邊個有最好機會，一係傳畀走空嘅康利或新秀艾寧頓射三分，或者傳畀蘭度夫強攻內線。
小加素另一絕招係籃底吸引兩人夾擊防守後，施施然做個背後彈地傳球，畀入楔嘅隊友輕鬆得分。
至於場均攻入16.7分蘭度夫每場喪搶13.6球籃板，當中5.2球為進攻籃板，為球隊提供五次二度進攻機會。控衞康利雖然星味不足，但每年都有一定進步，球風充滿侵略性，以近四成命中率射入14.8分嘅同時，亦可以送出6.5次助攻。
當然，灰熊並唔係完全冇弱點，基爾平均攻入20分，但係整體命中率得43.1%，比以往45%至47%稍為退步。而球隊三分能力雖然比以往進步，但佢地始終欠缺足夠嘅三分炮手，係灰熊比較令人擔心嘅地方。
邱益忠