比迪素走私槍械圓NBA夢

窮途未必係末路,「乞衣仔」比迪素亡命追逐籃球夢!快艇新季戰績可人,表現大躍進的基斯保羅「替工」比迪素尤其搶鏡,相信假以時日必定成為快艇新Icon。這位三年級生現時前途無限,但童年時代卻歷盡辛酸,曾淪落到要瞓街、執紙皮,甚至鋌而走險為黑幫「做嘢」賺錢買籃球練波,衝破重重障礙才成就NBA夢!

比迪素來自美國亞拉巴馬州的伯明翰市,由於兒時家徒四壁,窮到要在街上乞錢才夠買一張木櫈,其母親莫琳於是離開小鎮打工幫補家計,比迪素到親戚家中黐飲黐食,但又難忍親友排斥及白眼,於是在8歲時離家出走,過着流浪漢般的生活。

「乞衣仔」賺黑錢買籃球

比迪素當年瞓過廢鐵廠、馬棚甚至街頭,四處收集紙皮搭起簡陋帳篷及執爛被,與乞丐無異。窮到褲穿窿的比迪素雖然「乜都冇」,但對籃球的熱愛程度肯定爆燈,更自爆為賺幾美元買籃球,曾冒險為伯明翰當地黑幫帶槍,但就因為終日與籃球為伴而練得一身好球技,有幸入讀A.H.Parker高中及之後的肯塔基大學,並於2010年以第18順位獲雷霆揀中,其後轉投快艇展開NBA生涯。

今季比迪素僅於場均18分鐘的上陣時間就貢獻10.2分、2.5個籃板球及3.2次助攻,聯同基斯保羅及哥羅福等以56.8分成為聯盟得分最高的後場組合。昨晨這三人便合力貢獻54分,帶領快艇作客以103比90擊敗拓荒者錄得兩連勝,難怪比迪素賽後雄心壯志表示:「隊友叫我保持侵略性,以我的速度及剷籃能力,相信沒有一個控衞能擋得住我!」至於輸波的拓荒者後備球員質素參差,明早即使有地利亦難以抵擋馬刺進襲,馬刺讓4.5分要上盤。(周日早上11時開賽)