J.Lin有覺好瞓
「林瘋」終於有自己張床！呢位華裔明星控衞尋日首次出現於火箭主場豐田中心進行訓練，自然成為傳媒嘅焦點。林書豪早前因休斯敦新居傢俬未齊，搞到冇得入伙，要去隊友柏臣斯屋企瞓梳化。不過，J.Lin尋日喺facebook留言，話自己終於收到張床，有覺好瞓之餘仲乘機點評之前瞓過嘅梳化，究竟邊張好瞓啲，認真搞笑！
林書豪早前喺twitter表示由於趕唔切買床，搞到要去隊友柏臣斯屋企瞓梳化。梳化可以話係J.Lin籃球生涯嘅一個重要角色，記得當初効力紐約人未爆發時，佢曾經瞓過隊友菲爾斯屋企嘅梳化一段時間。
嫌菲爾斯梳化太短
J.Lin尋日除咗表示已經收到張床，終於可以返屋企瞓覺外，仲喺訓練之後同現場記者開玩笑，將自己瞓過嘅梳化整咗個排名：「首位是哥哥屋企嘅梳化，第二位係柏臣斯屋企嗰張、第三位係菲爾斯屋企嗰張。」J.Lin之後仲好有趣咁解釋：「菲爾斯屋企張梳化太短，所以只排第三，而柏臣斯嗰張都係細咗啲。」不過，以J.Lin依家嘅人氣同地位，相信之後都有排唔使瞓梳化啦！
減10磅托弗迎新季
講完梳化自然講吓身體狀況，J.Lin透露早前進行手術嘅膝蓋狀況好好，兩個月前已重返球場，7月更可「入樽」。之後J.Lin強調今夏已減咗10磅，將有助佢新球季變得更快更難防守：「我感到自己變輕咗同好健康，對即將來臨嘅新球季感到興奮。」J.Lin嘅傷勢已經完全康復，佢將會以百分百「托弗」嘅狀態出戰10月舉行的季前賽同之後嘅賽事，絕對令人期待。
另外，J.Lin在火箭首訓吸引過半百傳媒訪問，追捧程度直逼昔日的姚明，「林瘋」坦言暫未有機會與姚明詳談具體情況，但姚明稱可隨時找他。
火箭季前賽賽程
10月11日 Vs雷霆*
10月13日 Vs黃蜂*
10月15日 Vs馬刺*
10月16日 Vs小牛
10月18日 Vs灰熊*
10月25日 Vs黃蜂
10月27日 Vs魔術
註：*為主場
本報綜合報道