日本及巴西女子足球水平高，同屬奪金熱門球隊，今場八強戰嘅焦點一定落喺兩大球后正面交鋒，由日本澤穗希硬撼巴西瑪達。於今年一月舉行嘅國際足協頒獎典禮中，澤穗希力壓瑪達成為最佳女子球員。需知道瑪達之前已連奪五屆，如今畀澤穗希搶走，瑪達梗係面黑兼無癮啦！正所謂冤家路窄，兩位好波之人今次喺奧運八強碰頭，相信瑪達肯定會付出百分，誓要挫一挫澤穗希嘅銳氣，證明自己先至係球壇一姐。
計年齡的話，廿六歲嘅瑪達應比三十三歲嘅澤穗希更有活力。不過澤穗希勝在足球智慧高，應可彌補體力上差距。另外日本偶像級體操名將內村航平，剛啱以大熱姿態贏得男子體操全能金牌，日本女子足球隊送上祝賀之外，亦稱可為球隊刺激士氣。