雷阿倫劈價投熱火
NBA呢幾日都爆咗唔少好轟動嘅轉會消息，好似拿殊去湖人，傑特去紐約人同林書豪與火箭達成協議等，搞到Daniel每朝起身都第一時間上啲NBA網睇吓有冇最update嘅轉會消息。尋日一早終於睇到另一宗震撼消息，就係塞爾特人三巨頭之一嘅雷阿倫轉投熱火，與勒邦占士同韋迪並肩作戰。
雷阿倫今次轉投熱火可算係減薪加盟，因為熱火只能開出3年950萬美元（約7,410萬港元）薪酬，遠比綠軍嘅2年1,200萬美元（約9,360萬港元）為低，唔通雷阿倫真係為咗冠軍指環就嫌錢腥？
Daniel睇咗好多關於雷阿倫出走嘅報道，得出嘅結論係佢同控衞朗度關係惡化難以共存而造成。事實上，上季尾已多次傳出雷阿倫同朗度不和嘅新聞，佢兩個關係點解會變得咁緊張？其實同佢哋嘅性格有好大關係。雷阿倫性格內向但自尊心強，朗度則性格孤僻令人難以接觸，加上佢逐漸成為綠軍嘅首席主力，對球隊支配欲愈來愈強，自尊心強對支配欲強，自然形成更衣室炸彈，就算係主帥李華士都未必搞得掂。所以Daniel認為今日雷阿倫離開塞爾特人，或者對大家都係好事。
基斯保羅練波受傷
講開籃球，即將出戰倫敦奧運嘅美國男籃尋日喺拉斯維加斯作首課操練，點知其中一位肯定出戰嘅主力基斯保羅，卻整親拇指而要去做X光檢查。幸好基斯保羅傷勢並不嚴重，好有可能喺下一課訓練重返賽場。