過去10年，鄧肯係馬刺嘅代表人物，沉默、冷靜嘅個性同平穩無私嘅球風，雖然好難得到普遍球迷歡心，但確實向世人樹立正確嘅打波態度。
連續13年每季贏超過50場，4奪總冠軍，就係因為教練普波維治團隊至上及軍紀嚴明嘅作風下，幾乎冇聽過隊中鄧肯、柏加同真路比利三巨頭嘅爭權新聞，而其他配角無論係以往嘅保雲、艾利諾，到現時嘅丹利格連、李安納，都盡量做好本分，全心全意為球隊付出。
今季馬刺隊嘅作戰陣容異常恐怖， 一支冠軍隊應有嘅元素應有盡有，包括禁區主宰鄧肯、一對一得分好手柏加、手感迅速撻着嘅最強第六人真路比利、防守鎖匠李安納、士氣製造機史堤芬積遜、助攻籃板得分都掂嘅全能球員戴奧、一大堆命中率高嘅3分射手。呢隊馬刺即使最後未能拎到總冠軍，都會係歷來最強嘅一支馬刺隊。
講到咁勁，唔係睇死雷霆冇機會。雷霆要贏，首要任務係要降低馬刺3分球命中率，避免對手有極多空位輕鬆攞分。馬刺大前鋒邦拿將會係今次系列賽嘅「X因素」，一旦佢維持命中率高企，令到雷霆中鋒伊巴卡不時要離開3秒區附近去防守， 內線嘅鄧肯自然可以予取予攜咁攞分。