港隊頑抗2球負伊拉克

世界排名143位的港隊，是役作客排名79位的伊拉克，主帥麥柏倫開賽排出「451」陣式應戰，門將葉鴻輝、後衞（右起）唐建文、羅素、艾里奧、丹尼、中場徐德帥、陳俊樂、黃洋、羅拔圖、羅梓駿，艾力士則作單箭頭掛帥。雖然作客出擊，但賽事首個具威脅的攻門卻來自港隊，開賽5分鐘徐德帥右路扭過兩名敵衞後斜傳入禁區，「羅梓」後上入禁區，惜來遲一步未能成功接應。

港隊未能把握機會，之後成為主隊天下，7分鐘伊拉克中場塔里克殺入禁區，緊纏的丹尼情急下將其拉跌，來自阿聯酋的球證直指12碼，並向丹尼出示黃牌。極刑由穆罕默德阿里操刀，卻被葉鴻輝捉到路飛身救出；「阿輝」其後於21分鐘，再次飛身撲出主隊中場阿特曼的勁射，成功守住大門。但任守門員再好身手，始終需要後衞掩護，38分鐘主隊穆罕默德阿里頂贏羅素，皮球拋物線遠柱入網，替主隊半場領先1比0。

上下半場各失一球

易邊後，伊拉克繼續狂攻。47分鐘當日16歲之齡便成為大國腳的「金童」塔里克，右路窄位狂抽一腳，丹尼「瞓晒身」擋出。香港隊其後在58和62分鐘都有攻門鏡頭出現，惜艾力士的頭槌和羅梓駿的近射都被判越位在先。70分鐘港隊再有扳平良機，陳俊樂中場傳交後上的徐德帥，「阿帥」再回傳走位至禁區頂的「樂仔」，「樂仔」扣順一抽，皮球卻省中以身相阻的伊拉克隊長拿積。78分鐘港隊再度失守，穆罕默德阿里獨闖龍潭，扣過艾里奧後被丹尼掃跌，球證毫不猶豫再判12碼，由後備入替的後衞阿里亞蘭處理，「阿輝」捉到路照入，主隊拉開至2比0。86分鐘港隊派出辛祖和黃威，入替羅拔圖和陳俊樂，奈何未能扭轉局面，港隊奮戰終以0比2敗陣，3戰1和2負得1分，憑較佳得失球壓過柬埔寨，暫居小組尾二。港隊下輪將於11月14日主場迎戰巴林。

麥柏倫：節奏跟唔上

港隊主教練麥柏倫賽後認為球員已盡全力，惟仍有不少進步空間︰「伊拉克球員比較快，令賽事難以應付。我哋嘗試喺戰術上傾向密集防守，不過第一個失球有啲大意，球員冇去跳頂，第二球只係欠缺速度而輸12碼。伊拉克係值得全取3分，但我哋喺控球在腳時可以有更好表現，對手踢出國際賽水平嘅節奏，但港隊就只有香港嘅節奏。」

羅梓駿Feel到有進步

初段撲出12碼的葉鴻輝則認為球隊表現可接受：「始終係作客，人哋無論地理、天氣都比較適應，上半場初段對手壓迫做得好好，令我哋唔習慣，但之後開始識得應付對手，發揮OK嘅！」至於今仗正選披甲的羅梓駿，亦表示港隊戰至完場前仍有機會追和：「個人方面，對比番上場對伊朗，自己踢足全場，覺得無論體能定執行教練嘅防守要求上都有進步。至於球隊整體，我哋都係喺臨尾先輸到2比0，喺落後一球時都有機會入波，所以都叫做到教練嘅要求。」