季後賽首圈打得七七八八，係時候做過總結。
小牛隊第三場同第四場面對雷霆嘅主場賽事中，向每位入場觀眾派發一件天藍色T恤，希望全體觀眾以藍海包圍客隊。但睇來負責統籌嘅人無做足功課，因為雷霆嘅作客波衫係藍色，反而小牛隊主場波衫係白色，唔睇清楚以為雷霆先係主場球隊，究竟係打氣定倒米？
本來只屬交易豬頭骨嘅佐敦希爾由火箭換到湖人後，本來只係得7場上陣嘅大後備，點知到季後賽成為湖人不可缺少嘅後備兵。季後賽開始平均上場20分鐘左右，就可以射入7分同搶到9.3個籃板球，為湖人隊製造更多進攻機會。
如果講單打能力，安東尼進攻技巧真係無話可說，可能係數一數二全方位嘅得分手，不過佢領導能力真係唔掂，雖然個人好想紐約人反勝熱火，但真係好難。借用無綫主播黃大鈞一句「樣其實似吳孟達係其次，打法係主要問題，獨食唔防守、唔集中、又唔修身！」，你就知道點解不少人認為安東尼無價值了。
戴歷羅斯不幸傷出，公牛即刻跌Watt畀76人撳住嚟打無力反抗，攻不下守不穩，認真慘情。