林瓜磨合有排搞

「甜瓜」復出累街坊!自從「甜瓜」安東尼受傷之後,林書豪藉機上位領紐約人一度寫下7連勝,成績好過季初多多聲!殊不知安東尼一復出就做罪人,尋日11射4中僅入11分,反觀J.Lin將失誤減至3個,又貢獻21分、9次助攻、7個籃板及4次搶截,數據大勝「甜瓜」,可惜紐約人仍以92比100不敵籃網,「林瓜」組合有待磨合。

將以正選身份出戰今季明星賽嘅安東尼,養傷7仗後尋日正式復出,可惜「甜瓜」休戰太耐明顯不在狀態,手感差只入得11分,而且造出全隊最高6次失誤,復出反而連累球隊。「甜瓜」賽後表示:「我嘅表現係有啲『生銹』,不過絕對在我預計之內,我唔想操之過急,復出戰只希望感受一下場內氣氛,但我相信可以適應球隊現時嘅風格。」

籃網「林瘋亡魂」報番仇

事實上,為了遷就領袖安東尼,林書豪今場亦略減起手次數,盡量替球隊鋪橋搭路,結果J.Lin交出全面數據,更連續3場達4次搶截,亦係紐約人20年來第一人。不過林書豪完場前44.9秒6次犯規,係J.Lin生涯首次6犯離場。

籃網能夠擊敗紐約人,除「甜瓜」失準外,另一原因就係D.Will迪倫威廉士着火攻入38分,其中三分球入咗8個咁多!D.Will賽後High爆:「『林瘋』熱潮嘅誕生係源自我,當日林書豪在我身上大爆發贏波,賽後網民及傳媒都以林書豪打爆迪倫威廉士為題,我今場就係要來親自報仇!」另方面,「明星賽技巧賽」名單出爐,韋斯布克(雷霆)、柏加(馬刺)、迪倫威廉士(籃網)、約翰禾爾(巫師)、艾榮(騎士)及上季冠軍史堤芬居里(勇士)將會參賽。