港甲Babies足料報佳音 平安夜Make A Wish
如果命運能選擇，今晚平安夜想搵邊個陪你呢？唔使喺十字街口度諗咁多，《東方體育》特意喺呢個普天同慶嘅日子，為大家請嚟一班港甲Babies報佳音，仲會講吓新一年有乜嘢願望（Wish），仲會大派聖誕禮物！依家我哋就有請公民Honey、大埔Lulu、屯門Iris同Minnie隆重登場啦！
公民Honey：贏南華攞埋冠軍
公民嘅啦啦隊隊長Honey本身係「台妹」一名，又喺足球王國阿根廷長大，再加上做空姐要周圍飛，所以今年先至係佢第1年喺香港過聖誕！不過，就係因為做咗公民嘅打氣女神，令Honey可以過一個好特別嘅佳節：「因為做咗打氣代表，令我呢幾個月識到唔少球迷，亦多咗好多朋友，今個聖誕會約晒佢哋出嚟BBQ，熱熱鬧鬧過佳節！」
講到呢幾個月嘅「女神」生涯，Honey就話最難忘係公民對大埔嘅聯賽賽事：「開波前保連奴喺facebook同我哋講佢好想入波，於是成班fans不停為佢打氣，結果佢奔跑全場終於攞到入球，雖然場波最後輸咗，但我就勁感動，差啲喊咗出嚟！」
不滿陳七打人唔使罰
不過，Honey亦講番同佢最老友嘅球員「鹹蛋」馮啟匡，被足總重罰停賽11場，佢就希望出年佢「坐完波監」後可以大個仔識諗；不過，Honey對於「陳七」喺球場打人唔使罰，就覺得好唔公平囉！問到Honey喺2012年有乜願望，呢位「女神」許願話：「我想公民贏南華，甚至場場贏晒，贏埋個聯賽冠軍！」
圖、文：司徒子文