大埔Lulu：香港隊捧世界盃
去年獲委任為大埔足球大使嘅Lulu（董嘉儀），可以話係開創咗港甲「打氣女神」嘅先河，人氣之勁更被網友評為本地球壇10大影響力人物之一！呢位「神級Baby」今年仲得到Sezji、Vanessa、Icy及Janelle等4位新成員加盟，組成「Give Me 5」，聲勢更加壯大。
喺呢個普世歡騰嘅日子，Lulu就同大家講吓有乜聖誕願望：「今年已經係第2年同球迷過聖誕，願望就梗係想和富大埔喺新一年贏多啲波；仲有多啲球員入選港隊，咁香港就可以連世界盃都贏埋啦！」
1月7日入場有年曆送
Lulu講咗咁耐，究竟有冇聖誕禮物送畀大家先？佢就話：「當然有啦！我哋球會準備咗一批由球員同我哋嘅2012年年曆，只要喺1月7日大埔主場對屯門嘅聯賽入場，就可以攞到，不過數量有限，派完就無o架嘞！仲有……到時我會爆一個秘密畀各位知，就係我哋嘅Icy究竟鍾意邊個球員呢？想知……記得到時問我嘞！」