靚女主播醒你出鏡秘笈 Hailey:減少犯錯

球愛敢死隊出動!體育版「優質雄性動物」接受號召,組成一支史無前例兵團,走訪娛樂圈及各界靚女,講吓佢哋對波的感受,當中有愛情、奇情、癡情……乜情都有,務求要你讀完之後愛到死為止!

下個星期就係「西班牙國家打吡」大戰,由皇家馬德里主場對巴塞隆拿。為令大家身心做好準備,更加投入呢場「國家打吡」,今集球愛敢死隊請到靚女嘉賓Hailey(陳俞希)上嚟,同我哋傾吓波經兼玩吓遊戲,睇吓佢對波有幾了解。

曾喺收費電視睇過一條自我介紹短片,片中嘅女仔就咁講:「面對群眾表演,每次都不能有失。面對鏡頭,更加要專注過人,不容出錯,表現自我。」呢段咁專業嘅說話,就係出自Hailey嘞!我哋留意到裏面有不能有失以及不容出錯,由此可見Hailey對自己有好高要求,做乜都好認真。呢份認真令到場內嘅工作人員都倍感壓力,巨高喺拍攝期間仲驚到手騰腳震添。Hailey有咁大嘅震懾能力,自然係做節目主持嘅好材料啦!

成日NG會累己累人

大家都知Hailey透過比賽,成為now觀星台嘅主持人。能夠從多位參賽者中脫穎而出,當然有過人之處。實在Hailey以前已有唔少出鏡經驗,面對群眾或鏡頭,對佢嚟講可謂駕輕就熟。企出嚟講嘢淡定自然有信心,評審自然畀滿分。就好似今次攝製過程當中,Hailey可謂咧住巨高嚟行,唔講仲以為佢係導演,所以話有經驗係唔同啲。

其實巨高都有求教Hailey,問佢拍攝期間有咩要注意。Hailey就贈我四個大字:「減少犯錯」。Hailey話拍攝期間有好多人,比如導演、燈光、攝影師、場務、攝影、收音,個個都準備好晒,你成日犯錯NG又嚟過,人哋唔鬧你,自己都唔好意思啦。所以Hailey覺得減少犯錯係好緊要:「少啲NG,拍起嚟又順暢啲,又可以早啲收工,下次醒目啲喇。」係嘅係嘅,下次唔會。

陳俞希Hailey C. Profile

年齡:23歲

身高:1米58

興趣:睇書、睇戲、聽歌、演戲

演藝CV:

2009年 香港書展出版《8模少女館》寫真集

2008年 出演綜藝節目《高清補習社》

2007年 Apple Girl競選亞軍

SONY大使競選季軍及才藝大使季軍

2006年 新城及港台 part time DJ

MV:

吳雨霏 分手要狠、這麼難

孫耀威 戰場上的最後聖誕

電影:

2010 惡胎、疆屍新戰士

文:巨高 圖:司徒子文