星級4仔團！GO！

Google全程網上直播

自從勞資雙方談判失敗，令ＮＢＡ賽季繼續停擺，由ＮＢＡ球員出席嘅籃球表演賽一直未停過，據了解在抖暑後21個星期內，就出現多達300場表演賽，接近全季賽事嘅25％。「閃電俠」韋迪表示：「我實在厭倦現時嘅日子，球員需要比賽，我哋都渴望佩戴裝備落場比賽，所以決定組織今次賽事。」

今次巡迴表演賽地點選了「風塵四俠」嘅家鄉或球會所在地，首先係勒邦占士家鄉俄亥俄州阿克倫市，然後就輪到基斯保羅嘅球會所在地新奧爾良，之後係韋迪出生地芝加哥，尾站就輪到安東尼出生地紐約州鄰近嘅新澤西East Rutherford市。４場賽事所有收益，分別會捐贈４人所支持嘅慈善機構，而贊助商Google將會為所有賽事作網上直播，安東尼透露：「打籃球同回饋社會都係我最愛做嘅事，好開心能成為其中一分子。」

叛徒大帝勢遭噓爆

不過「大帝」勒邦占士今次返鄉，好可能要有心理準備畀人柴台，事關「大帝」自從離開騎士之後，就被俄亥俄州人視為永恒叛徒，每次返回家鄉比賽都遭到狂噓，根本唔受鄉里歡迎！幸好占士膽識過人，仲透露在家鄉舉辦咁有意義嘅賽事，自己都覺得驕傲，希望球迷今次可以放佢一馬，噓少啲咁話啦！

本報綜合報道