兩岸四地辣妹激鬥 東望洋熱爆舞池
「Racing Queen軍團」搶閘殺入東望洋！澳門大賽車今明兩日進行多場正賽，包括三大賽事之一嘅格蘭披治電單車，賽道內爭得激，賽道外嘅Racing Queen亦鬥餐勁，今屆分別有來自中港台澳兩岸四地多達廿六名囡囡到場，車迷睇賽車之餘亦不忘睇靚女。（無綫翡翠台今午1時15分起直播）
寶島美眉跳熱舞
賽車女郎已成為近年澳門格蘭披治大賽主菜，一眾Racing Queen今屆為突圍而出亦施展新招，一行三人嘅「台灣美眉」除大賣驕嗲可愛外，還打破傳統唔只硬崩崩擺Pose騷身材，佢哋即場播歌熱舞，十足十將舞池搬到澳門一樣，睇到唔少車隊職員都Fing頭扭腰，想整杯啤跳舞。
至於「香港佳麗」亦唔嘢少，四位靚女有三人拍過電影，Joey在《游龍戲鳳》飾演何韻詩秘書，而Grace就在《最強喜事》被葉問上身嘅甄子丹化妝。Sin最犀利，有份參演早前在康城影展揚威嘅電影《桃姐》，但由於套戲仲未在港上影，所以佢都未知有冇自己嘅片段。至於未拍過戲嘅索模Vanessa就以身材搭夠，仲話要越級挑戰尋日都有到場嘅索摸許穎，同佢大鬥身材。
兔女郎走光出位
全日最搞鬼就要落在四名外籍兔女郎Racing Queen身上，其中一隻泰籍「大白兔」本身胸前偉大已經逼爆件衫，殊不知佢整一整件低胸裝仲即時大走光，即時引到大批龍友衝前喪影，真係橋唔怕舊最緊要受。
不過都唔係個個賽車女郎都博出位嘅，好似澳門代表尋日就主打清純，五個小妹妹健康造型別樹一格，令人有一種初戀感覺。原來呢批澳門賽車女郎係由WTCC聘請，公關透露尋日係行清純，但正賽日就會有番真正Full Gear嘅Racing Queen到場，展示「地頭蟲」嘅威力。
黃兆崑、梁嘉輝澳門直擊