阿旦追星只buy乖仔

大家對o靚模有乜感覺？老實講拿仁唔多Buy，部分得個殼冇內涵，一開聲就幼稚得令人毛管戙。但今年書展出過噴血寫真嘅鄧伊玲（阿旦），除樣靚身材正外，仲謙謙有禮口才了得，而且唔認同「男人不壞，女人不愛」，勁憎私生活沙沙滾、周時擺款Chock爆嘅C朗，反而勁迷好男人卡卡，真有Taste！

阿旦今年26歲，但樣子甜美細細粒，周時擺出迷人笑容，有人話過咗25歲就係中女，但喺阿旦身上，就完全搵唔到中女味道。因為身材豐滿，阿旦素有「E級教主」之稱，但佢唔騷身材，着上英格蘭波衫，一樣可愛到引死人。

大賽鍾意落Pub睇波

講起睇波，阿旦話每逢大賽，都會同班朋友柴娃娃落Pub睇波，而且幾冧奧雲：「我覺得佢射波好勁呀，成日一起腳就入，但依家冇咩機會見到佢落場喇。」

阿旦好坦白話自己鍾意睇靚仔，但就只限「乖乖靚仔」，粗魯講粗口吸毒溝女召妓者，全部唔會鍾意，咁當時得令嘅C朗又點先？阿旦即時擰晒頭：「唔鍾意佢！佢之前喺曼聯成日有負面新聞，周圍識女仔仲試過開性派對，性格咁差，幾好波都冇用！」唔係喎，依家佢改邪歸正，有傳就同女友結婚喎。「No No No！總之個底係花就花，點知佢之後會唔又曳曳！」

咁挑剔，咁你鍾意邊個先？「梗係卡卡啦。佢斯文靚仔唔在講，仲係個好好先生，對青梅竹馬嘅女友從一而終，依家結咗婚仲有埋ＢＢ添，真係好Sweet呀。最近佢喺皇馬攞番正選，真係戥佢開心，好人係有好報架！」睇真啲，阿旦個主持男友阿感個樣都有啲似卡卡喎！

圖：司徒子文