Phoebe識Ball！好波！

新一季歐洲聯賽進行得如火如荼，香港「全民皆波」，連索模Phoebe（許穎）亦唔例外！今期《球愛敢死隊》美女主角Phoebe，向麥馬拿仁大爆睇波另類癖好、傳授keep fit至叻心得，仲瞓身接受足球終極測試，大騷優秀腳法表演「的波」。Phoebe全身投入足球愛海之中，完全做到「有波，就有許穎」！

曾經做過電視台「足球Babe」嘅Phoebe，細細個已接觸足球，中學時曾柴娃娃跟成班同學仔入旺角場睇波，又受碧咸「美色所迷」，狂煲世界盃成為英格蘭fans。但大個咗Phoebe轉晒口味，話唔鍾意得個樣嘅球星，反而欣賞巴塞隆拿中場「傳送王」沙維：「佢雖然唔算靚仔，但落到場好有魅力，冇佢巴塞邊有咁威喎！」另外佢仲好欣賞朗拿度，「我好記得佢對哨牙，佢跑得好快架，我覺得佢勁過碧咸好多。」叻女！真係十個女仔，十個都覺得碧咸最勁架。

「男仔一定要有火先得」

拿仁問Phoebe以前同依家男友鍾唔鍾意睇波，佢話依家冇男友，而以前嘅亦非特別「嗜波」。如果第時男友成日掛住睇波唔理你，你又點先？Phoebe充滿信心咁話：「我唔信佢會鍾意足球多過我囉，哈哈哈！講真我有時間就會同佢一齊睇波，而且睇波係正常嗜好，好過唔知佢去咗邊啦！」如果有機會，Phoebe最想去英國睇波，因為貪嗰度比賽氣氛激烈，個個球員都好有火：「男仔一定要有火先得！」

Phoebe自言係「電視精」，細個電視播乜就睇乜，所以世界盃同奧運都係必睇節目，「奧運好好睇，因為全世界最勁嘅運動員都喺晒度，我特別鍾意睇跳水，成日睇實佢哋多唔多『水花』，我都可以做評判架！」

百變球衣show	放大圖片	放大圖片

圖：司徒子文