皇馬收千萬做布景板

戰略性合作 每兩年訪華

原本根據官方公布，呢個啟用儀式由恒大主席許家印及皮里茲主持，只係搵咗C朗一個做嘉賓，同時間其餘球員喺入住酒店舉行簽名會，不過簽名會臨時取消，所有球員就去晒恒大國際足球基地啟用儀式撐場。

呢個畀面派對認真星光熠熠，班球員仲要喺趕住一課訓練嘅情形下出席，淨係車程來回都個半鐘，仲要喺攝氏三十三度烈日當空暴曬，比比就拿拿聲擔番把遮，沙比阿朗素就熱到皺晒眉，儀式一完，成班球員即刻衝上車歎冷氣。

至於皇馬同恒大將會有長期戰略性合作，每年恒大會派青年球員去皇馬訓練，而皇馬就每兩年來華一次，而恒大如果去歐洲集訓，皇馬會提供訓練基地。此外，皇馬會將旗下球員以租借形式轉會恒大，而恒大球員亦有機會加盟皇馬。

呢個格局似足政要高峰會議。	比比（中）熱到擔遮。	格尼路（右）同沙比阿朗素密密斟。