C朗Chok住爆笑
C朗經過兩日休息終於回復狀態，出席恒大訓練基地啟用儀式不斷Chok樣自娛，喺球隊訓練前記者會，不論球隊同私人問題都有問必答，話嚟緊歐洲足球先生選舉，有信心可擊敗美斯及沙維當選，又話八月中嘅西班牙超級盃對皇馬好重要，必定要全力爭勝，仲親口承認自己會幫小C朗換尿片。
對於皇馬新球季情況，C朗話暫時好難答，因為要過一段時間先可以同上季比較，但佢認為球隊唔使再買攻擊球員。至於世界盃外圍賽抽籤，葡萄牙同俄羅斯一組，C朗表示對葡萄牙出線非常有信心，因為國家隊有好多好球員，可以取得好成績。
會同BB換尿片
記者會上亦有私人問題，有人問到C朗打得一手好乒乓波，識唔識中國乒乓球手，C朗聽完問題即刻哈哈大笑，答案仲好鬼馬：「認得，但係我嗌唔出名，因為中文發音好難，不過我真係知道，我認得出佢哋o架！」另外，佢就承認有時候會同BB換尿片。